மூட்டு வலி: வயதாவதின் தவிர்க்க முடியாத வலியா?

“வயசானா மூட்டு வலி வரத்தான் செய்யும்” – இது நம்மில் பலரும் வீட்டில் கேட்கிற, சில சமயம் நாமே சொல்கிற ஒரு வரி. காலை எழுந்ததும் ஒரு சின்ன முனகல், மாடிப்படி ஏறும்போது ஒரு தயக்கம், பேரக்குழந்தைகளோடு ஓடிப்பிடித்து விளையாட முடியவில்லையே என்ற ஓர் ஏக்கம் என இந்த மூட்டு வலியின் தாக்கம் வெறும் உடல் அளவிலானது மட்டுமல்ல.

உண்மைதான், உடம்புக்கு வயதாவதைப்போலவே மூட்டுகளுக்கும் வயதாகும். ஆனால், அதற்காக வலியை அப்படியே சகித்துக்கொள்ள வேண்டுமா என்றால் நிச்சயம் இல்லை. நூறு வயது வரை உற்சாகமாக வாழ வேண்டும் என நாம் விரும்புகிறோம், ஆனால் இந்த வலி நமது அன்றாடச் செயல்பாடுகளையே பாதித்து, வாழ்க்கைத் தரத்தைக் குறைத்துவிடுகிறது.

கவலை வேண்டாம். சரியான மூட்டு வலி மேலாண்மை (joint pain management) மூலம் இந்த நிலையை மாற்ற முடியும். இந்த விரிவான வழிகாட்டியில், வீட்டு வைத்தியங்கள் முதல் நவீன மூட்டுவலி சிகிச்சைகள் (joint pain treatments) வரை, வயதானவர்களுக்கு ஏற்படும் மூட்டு வலி மேலாண்மைக் குறித்துப் படிப்படியாகப் பார்க்கப் போகிறோம்.

ஆனால், ஒரு சிகிச்சைக்குள் நுழைவதற்கு முன், ‘நமக்கு ஏன் இந்த வலி வருகிறது?’ என்ற அடிப்படைக் காரணத்தை நாம் புரிந்துகொண்டால், பாதிப் பிரச்சினைத் தீர்ந்ததுபோலத்தான். வாருங்கள், அங்கிருந்து தொடங்குவோம்.

மூட்டு வலி: குற்றவாளிகள் யார் ?

சரி, இந்த மூட்டு வலிக்கு உண்மையான காரணம் என்ன? ‘வயது’ என்று ஒரே வார்த்தையில் சொல்லிவிடலாம். ஆனால், அது மேலோட்டமான பதில். கொஞ்சம் ஆழமாகப் பார்த்தால், இந்த வலிக்குப் பின்னால் இரண்டு முக்கிய வில்லன்கள் இருக்கிறார்கள். அவர்களைத் தெரிந்துகொள்வது, பிரச்சினையைச் சரிசெய்வதற்கான முதல் படி.

முதலாவது, ஆஸ்டியோஆர்த்ரைடிஸ் (Osteoarthritis). இதுதான் வயதாவதால் ஏற்படும் தேய்மானம். எளிமையாகச் சொல்ல வேண்டுமென்றால், நமது வண்டி ஓட ஓட டயர்த் தேய்வது போல, வருடங்கள் செல்லச் செல்ல மூட்டுகளும் தேய்கின்றன. குறிப்பாக, எலும்புகளின் முனைகளுக்கு இடையே ஒரு ‘அதிர்ச்சி உறிஞ்சி’ (Shock absorber) போலச் செயல்படும் கார்டிலேஜ் (cartilage) என்கிற மென்மையான ஜவ்வு தேய்ந்துவிடும். இதன் விளைவாக எலும்புகள் நேரடியாக உரச ஆரம்பிக்கும். அப்போதுதான் வலி, காலையில் எழுந்ததும் ஒருவித விறைப்பு, நடக்கும்போது ‘நறுக் நறுக்’ எனச் சத்தம் எல்லாம் ஆரம்பமாகும். இதைத் ‘தேய்மான வலி’ என்று வைத்துக்கொள்ளலாம்.

இரண்டாவது வில்லன் இன்னும் கொஞ்சம் சிக்கலானவர். இங்கே பிரச்சினை வெளியிலிருந்து வருவதில்லை; நம்மிடமிருந்தே வருகிறது. இதுதான் ருமாட்டாய்டு ஆர்த்ரைடிஸ் (Rheumatoid Arthritis). சில சமயம், நமது உடலின் சொந்தப் படையே, அதாவது நோய் எதிர்ப்பு அமைப்பே (immune system), குழப்பத்தில் தனது வேலையை மறந்து, நம் மூட்டுகளில் உள்ள நல்ல திசுக்களையே எதிரிகளாக நினைத்துத் தாக்க ஆரம்பித்துவிடும். இது ஒரு ‘ஆட்டோ இம்யூன் கண்டிஷன்’ (autoimmune condition). இதனால் மூட்டுகளில் கடுமையான வலி, வீக்கம், இறுக்கம் போன்றவை உண்டாகும். இதை ‘அழற்சி வலி’ எனலாம்.

இந்த இரண்டு முக்கிய ஆர்த்ரைடிஸ் (Arthritis) வகைகளைத் தவிர, யூரிக் அமிலம் அதிகமாகச் சேர்வதால் வரும் கவுட் (Gout), தசைநார் அழற்சியான டெண்டினிடிஸ் (Tendonitis), மூட்டுப்பை அழற்சியான பர்சிடிஸ் (Bursitis) போன்ற வேறுசில துணைப் பிரச்சனைகளும் சிலருக்கு மூட்டு வலியை ஏற்படுத்துவதுண்டு.

காரணம் எதுவாக இருந்தாலும், மூட்டுகளில் வீக்கம், தொட்டால் சூடாக உணர்வது, சிவந்துபோதல், காலை மடக்கவோ நீட்டவோ முடியாமல் போவது போன்ற அறிகுறிகள் பொதுவாக இருக்கும். சரி, இப்போது குற்றவாளிகளை ஓரளவு அடையாளம் கண்டுவிட்டோம். அடுத்ததாக, இவர்களைச் சமாளித்து இந்த வலியிலிருந்து நிவாரணம் பெறுவது எப்படி என்று பார்ப்போம்.

மூட்டு வலிக்குத் தேவையான செயல்முறை !

பிரச்சனைகளை அடையாளம் கண்டாயிற்று. சரி, அடுத்து உடனடியாக மருத்துவமனைக்குச் செல்ல வேண்டுமா என்று கேட்கும் முன் கொஞ்சம் பொறுங்கள். நம்முடைய முதல் கட்ட தாக்குதலை வீட்டிலிருந்தே தொடங்கலாம். எடுத்த எடுப்பிலேயே பெரிய சிகிச்சைகளுக்குப் போவதற்கு முன், இந்த எளிய வழிமுறைகள் பெரிய மாற்றத்தை ஏற்படுத்தும்.

இந்த வீட்டு வைத்தியங்கள் என்பது வெறும் பாட்டி வைத்தியம் மட்டுமல்ல. இது ஒரு கச்சிதமான ‘ஒருங்கிணைந்த வாழ்க்கை முறை மேலாண்மை’ (integrated lifestyle management). இதுதான் நம்முடைய ஒட்டுமொத்த மூட்டு வலி மேலாண்மை (joint pain management) திட்டத்தின் அடித்தளம். இதைச் சரியாகச் செய்வதே வயதானவர்களுக்கு ஏற்படும் மூட்டு வலி மேலாண்மையின் முதல் படி.

சரி, நாம் செய்யவேண்டிய விஷயங்கள் என்னென்னவென்று பாப்போம்:

சூடானதா அல்லது குளிர்வானதா எது சிறந்தது:

முதலில், வெப்ப மற்றும் குளிர்ச் சிகிச்சை (Heat and Cold Therapy). சுளுக்குப் பிடித்தால் சூடாக ஒத்தடம் கொடுப்போம் இல்லையா அதே வழிமுறைதான். வெப்ப சிகிச்சை, இறுக்கமான தசைகளைத் தளர்வாக்கி, ரத்த ஓட்டத்தை அதிகப்படுத்தும். இதனால் வலி குறையும். அதே சமயம், மூட்டுகளில் வீக்கம் இருந்தால், ஐஸ் கட்டிகளைக் கொண்டு குளிர்ச் சிகிச்சைக் கொடுப்பது அந்தப் பகுதியையே கொஞ்சம் மரத்துப்போகச் செய்து, வீக்கத்தைக் குறைக்கும். எளிமையான வழிமுறை!

அசைவே மருந்து:

‘வலியில் எப்படி உடற்பயிற்சி செய்வது?’ என்று கேட்கலாம். நியாயமான கேள்விதான். ஆனால், அசைவின்மைதான் ஆபத்து. மணிக்கணக்கில் ஒரே இடத்தில் அமர்ந்திருப்பது அந்தப் பிரச்சனைகளை மேலும் அதிகப்படுத்திடும் ஆபத்தைத் தந்து விடும். வழக்கமான உடற்பயிற்சி அவசியம். ஆனால், கடினமான பயிற்சிகள் வேண்டாம். நடைப்பயிற்சி, நீச்சல் போன்ற குறைந்த-தாக்கப் பயிற்சிகள் (low-impact exercises) மூட்டுகளுக்குப் பாரம் கொடுக்காமல், சுற்றியுள்ள தசைகளை வலுப்படுத்துதல் மற்றும் மூட்டுச் செயல்பாடு ஆகியவற்றை மேம்படுத்தும். அதிலும், நம் உடல் தோரணை (posture) ரொம்ப முக்கியம். கூன் போட்டபடி கணினி அல்லது மொபைலைப் பார்த்தால், வலி வரதானே செய்யும்.

சாப்பாட்டில் ஒரு அறுவைச் சிகிச்சைத் தாக்குதல்:

எடை மேலாண்மை (Weight management) பற்றிப் பேசாமல் இதை முடிக்க முடியாது. நம் உடல் எடையில் ஒவ்வொரு கிலோ கூடும்போதும், அது நம் மூட்டுகளின் மேல் பல மடங்கு கூடுதல் சுமையை ஏற்றுகிறது. வண்டியில் அதிக எடை ஏற்றினால் டயர்ச் சீக்கிரம் தேயும்தானே, அதே கணக்குதான். ஆரோக்கியமான உணவு முறைக்கு மாறுவது அவசியம். குறிப்பாக, உடலில் ஏற்படும் வீக்கம் / அழற்சியைக் குறைக்கிற ஒமேகா-3 உள்ள மீன் வகைகள், கால்சியம் மற்றும் வைட்டமின் டி நிறைந்த உணவுகள் நம் பலத்தைக் கூட்டும். பாக்கெட் சிப்ஸ், சர்க்கரைக் கலந்த பானங்கள், அதிக உப்பு போன்ற இதெல்லாம் பிரச்சனையை ஏற்படுத்த உதவுபவை. கவனமாக இருக்க வேண்டும்.

இந்தச் செயல்முறைகள் எல்லாம் சரியாகச் செய்தாலே பலருக்கும் வலி கட்டுக்குள் வந்துவிடும். ஒருவேளை, வலி குறையவில்லை, அல்லது இன்னும் தீவிரமாகிறது என்றால் கவலை வேண்டாம். அப்போது நாம் அடுத்த கட்டத்திற்கு நகர வேண்டும். நவீன மருத்துவத்தில் இதற்கெனவே பிரத்யேகமான மூட்டுவலி சிகிச்சைகள் (joint pain treatments) நிறைய உள்ளன. அவை என்னென்ன என்று அடுத்ததாக அலசுவோம்.

மருத்துவம்: அடுத்தகட்ட நகர்வு

வீட்டில் செய்த செய்முறைகள் எல்லாம் முடிந்தும், இந்த வலி குறையாமல் இருக்கும். இரவில் புரண்டு புரண்டு படுத்தும் நிம்மதி இருக்காது. இந்த நிலையில் இனி தயங்கிப் பயனில்லை. நமது செயல்பாட்டில் அடுத்தகட்டத்திற்கு நகர வேண்டிய நேரம் இது. வாருங்கள், நவீன மருத்துவத்தின் உதவியை நாடுவோம்.

முதலில், உங்கள் மருத்துவர் ஒரு துப்பறிவாளரைப் போல உங்கள் வழக்கை விசாரிப்பார். உங்கள் அறிகுறிகள், மருத்துவ வரலாறு என அனைத்தையும் கேட்டு, வலிக்கான மூல காரணத்தைக் கண்டறிவார். பயப்படத் தேவையில்லை. ஒரு முறையான மூட்டு வலி மேலாண்மை (joint pain management) திட்டத்தில், நவீனச் சிகிச்சைகள் ஒரு படிப்படியான அணுகுமுறையையே கையாள்கின்றன.

முதல் களம்: மருந்து, மாத்திரைகள்

முதற்கட்டமாக, மருத்துவர்ச் சில வலி நிவாரணிகள் (Analgesics) அல்லது அழற்சி எதிர்ப்பு மருந்துகளை (Non-steroidal anti-inflammatory drugs – NSAIDs) பரிந்துரைப்பார். இவை வலியைக் குறைத்து, உடனடி வலி நிவாரணம் அளிக்கும். ஆனால், இங்கே ஒரு முக்கியமான எச்சரிக்கை: இவை நாமாகவே மருந்து கடையில் வாங்கிச் சாப்பிடும் விஷயங்கள் அல்ல. நீண்ட நாள் பயன்பாட்டால் மருந்துகளின் பக்க விளைவுகள் வர வாய்ப்புள்ளது. எனவே, மருத்துவரின் ஆலோசனையின்றி ஒரு மாத்திரையைக்கூடத் தொடக் கூடாது.

அடுத்த ஆயுதம்: ஊசிகள்

மாத்திரைகளில் கட்டுப்படவில்லை என்றால் அடுத்தது, ஒரு குறிவைத்த தாக்குதல்போல, ஊசிகள். கார்டிகோஸ்டீராய்டு (Corticosteroid) போன்ற மருந்துகளை நேரடியாக வலிக்கும் மூட்டில் செலுத்துவார்கள். இது வலியையும் வீக்கத்தையும் உடனடியாகக் குறைக்கும் ஒரு சக்தி வாய்ந்த வழிமுறை.

இறுதி அஸ்திரம்: அறுவைச் சிகிச்சை

வலி மிகவும் தீவிரமாகி, மூட்டுகள் தேய்ந்து கடுமையான மூட்டுச் சேதம் ஏற்பட்டிருந்தால், கடைசி மற்றும் உறுதியான தீர்வாக அறுவைச் சிகிச்சை இருக்கிறது. குறிப்பாக, மூட்டு மாற்று அறுவைச் சிகிச்சை (Joint replacement surgery) என்பது வெறும் வலியைக் குறைப்பது மட்டுமல்ல; அது நமது வாழ்க்கைத் தரத்தையே மறுதொடக்கம் செய்து, மீண்டும் நம்மை உற்சாகமாக நடமாட வைக்கும் ஒரு வரம்.

இந்த மருத்துவப் பயணத்தில், சரியான நிபுணரின் வழிகாட்டுதல் மிக அவசியம். நமது பொது மருத்துவர் ஒரு வழிகாட்டிப் போல இருந்தாலும், இது போன்ற விஷயங்களில் நிபுணர்களின் உதவி தேவை. வயதானவர்களுக்கு ஏற்படும் மூட்டு வலி மேலாண்மை என்று வரும்போது, வாத நோய் நிபுணர் (Rheumatologist) அல்லது எலும்பியல் அறுவைச் சிகிச்சை நிபுணர் (Orthopaedic surgeon) போன்ற சிறப்பு நிபுணர்களை அணுகுவது, நமக்குத் தெளிவான பாதையைக் காட்டும்.

இந்த மருத்துவத் தீர்வுகள் அனைத்துமே வலிக்கு எதிரான நமது போராட்டத்தில் சக்திவாய்ந்த கருவிகள்தான். ஆனால், உண்மையான வெற்றி என்பது, இவற்றை நமது வாழ்க்கைமுறை மாற்றங்களுடன் ஒருங்கிணைப்பதில்தான் அடங்கியிருக்கிறது. அடுத்து, இதுவரை நாம் பார்த்த அனைத்தையும் தொகுத்து, ஒரு முழுமையான தீர்வை நாம் எப்படி அடையலாம் என்று பார்ப்போம்.

மேலும் வாசிக்க :  முதுமையை வெல்லும் மந்திரம்: சரியான ஊட்டச்சத்து!

பயணம் முடியவில்லை… தொடங்குகிறது!

இவ்வளவு தூரம் பயணித்துவிட்டோம். மூட்டு வலிக்கான காரணங்கள் எனும் குற்றவாளிகளைப் பார்த்தோம், வீட்டுப் பாடங்களைச் செய்தோம், நவீன மருத்துவத்தின் அடுத்தகட்ட நகர்வுகளையும் அலசினோம். இப்போது நாம் வந்தடைந்திருக்கும் இறுதிப் புள்ளி இதுதான்: மூட்டு வலி என்பது ஒரு முற்றுப்புள்ளி அல்ல; அது வாழ்க்கையின் ஒரு அடுத்த கட்டம் மட்டுமே. நம்மால் நிச்சயம் கையாளக்கூடிய ஒரு சவால்.

ஒரு முழுமையான மூட்டு வலி மேலாண்மை (joint pain management) என்பது ஒரு தனி ஆள் செய்யக்கூடியது அல்ல. அது ஒரு குழுவாகப் பயணிப்பதாகும். வீட்டு வைத்தியங்கள், நமது வாழ்க்கை முறை மாற்றங்கள், தேவைப்பட்டால் நவீன அறுவைச் சிகிச்சைவரை நீளும் மருத்துவ சிகிச்சைகள் என அனைத்தும் சரியான விகிதத்தில் கலந்த ஒரு கூட்டணிதான் அது. இந்த ஒட்டுமொத்த முயற்சியின் இலக்குகள் மிகத் தெளிவானவை: வலியிலிருந்து நிவாரணம் பெறுவது, முடங்கிக் கிடக்காமல் மேம்பட்ட மூட்டு செயல்பாட்டின் மூலம் மீண்டும் சுறுசுறுப்பாக மாறுவது, எல்லாவற்றுக்கும் மேலாக நமது வாழ்க்கைத்தரம் (quality of life) குறையாமல் பார்த்துக்கொள்வது.

வலியைப் பல்லைக் கடித்துக் கொண்டு சகித்துக்கொள்வது ஒரு தியாகம் அல்ல; அது தேவையற்ற பழக்கம். வலி நம் அன்றாட வாழ்க்கையில் தலையிட ஆரம்பிக்கும்போதே சுதாரித்துக்கொள்வதுதான் புத்திசாலித்தனம். அது மூட்டுகளில் மேலும் சேதம் ஏற்படுவதைத் தடுக்கும்.

ஆகவே, இனியும் தயக்கம் வேண்டாம். நமது ஆரோக்கியத்திற்குத் தேவையான செயல்பாட்டு முறைகளை நம் கையில் எடுப்போம். ஒரு நல்ல மருத்துவரைச் சந்தித்து, உங்களுக்கென ஒரு பிரத்யேகச் சிகிச்சைத் திட்டத்தை வகுத்துக்கொள்ளுங்கள். இதன்மூலம், வலிகளிலிருந்து விடைபெற்று, சுறுசுறுப்பான, சுதந்திரமான, நூறு வயது வரை நீடிக்கும் மகிழ்ச்சியான வாழ்க்கையை நோக்கி நாம் முதல் அடியை எடுத்து வைக்க முடியும்.